MANILA, Philippines - Lasog ang isang 26-anyos na dalaga makaraang mabundol ng rumaragasang public utility vehicle habang tumatawid sa tinaguriang killer highway, ang Commonwealth Avenue, sa lungsod Quezon, kamakalawa ng gabi.
Sa ulat ng Quezon City Police Traffic Sector 5, nakilala ang nasawi na si Maybelin Poliarco, empleyado at residente sa Pag-ibig, Brgy. Commonwealth sa lungsod.
Ang driver ng PUJ (PBG-529) na si Jeremy Lagua, 20, binata ng Bagong Silang Caloocan City ay kusang sumuko naman sa tanggapan ng TS6.
Nangyari ang insidente sa may kahabaan ng Commonwealth Avenue, malapit sa Don Fabian St., Brgy. Commonwealth, ganap na alas-6:40 ng gabi.
Sinasabing tumatawid ang biktima sa nasabing kalsada habang tinatahak naman ng PUJ na minamaneho ni Lagua ang south-bound lane nang pagsapit sa naturang lugar ay mabundol ng huli ang una.
Sa lakas ng pagkakaÂbangga, bahagyang tumilapon ng ilang metro ang biktima sanhi para mapuruhan ang ulo nito, saka isinugod ng ilang nagmalasakit na residente sa Malvar Hospital, subalit idineklara ring dead-on-arrival.