MANILA, Philippines - Agaw-buhay ang isang electrician matapos pagbabarilin ng isa sa dalawang holdaper na tandem sa Caloocan City kahapon.
Inoobserbahan sa Manila Central University Hospital sanhi ng mga tama ng bala sa katawan ang biktimang si Solomon Llumba, 46, ng Posadas St., Punta, Santa Ana, Manila.
Sa ulat ng Caloocan City Police, dakong alas-6:45 ng umaga, habang naglalakad ang biktima sa kahabaan ng Ignacio St., nang tabihan ito ng mga suspek.
Bumaba ang isa sa mga suspek sabay tutok ng baril at nagpahayag ng holdap.
Nang kukunin na ng suspek ang kuwintas ng biktima ay nanlaban ang huli na naging dahilan upang putukan ito.
Matapos ang insidente ay tumakas na ang mga suspek, gayunman hindi natangay ang kuwintas ng biktima habang dinala naman ang huli sa nabanggit na ospital.