RTW trader nilikida

MANILA, Philippines - Isinabay ng gunman ang ingay ng paputok sa pamamaril laban sa RTW trader sa pagsalubong sa Bagong Taon sa Brgy. Commonwealth, Quezon City, ayon sa ulat ng pulisya kahapon.

Kinilala ang napaslang na si Reynold Quezada, 51, ng #135 Steve St. sa nabanggit na barangay.

Ayon kay SPO1 Johnny Mahilum, naganap ang pamamaril sa may harap ng tindahan ng biktima sa kahabaan ng Commonwealth Avenue malapit sa Bicol Leyte St. bandang alas-10:15 ng gabi.

Sa salaysay ng ka-live-in na si Susana Camenoz,  ina­asikaso niya ang negosyo nang makarinig ng umuungol sa labas ng kanilang tindahan.

Dahil dito, nagpasya si Susana na usisain kung saan bumulaga sa kanya ang kinakasamang biktima habang umaagos ang dugo sa ulo nito.

Agad na humingi ng tulong si Susana sa mga kapitbahay kung saan ang ilan ay ipinaabot sa pulisya  ang naganap na pamamaril.