Onsehan sa droga, kelot dinedo
MANILA, Philippines - Onsehan sa droga ang pinaniniwalaang motibo sa pamamaslang sa isang 27-anyos na lalaki, makaraang pasukin sa loob ng bahay saka pagbabarilin kahapon ng umaga sa Baseco Compound, Port Area, Manila.
Nakilala ang biktimang si Mark Dave Maravile ng #772 Blk. 1 Gasangan, Dubai St., Baseco Compound.
Samantala, dalawa sa suspect na pawang armado ng baril ang mabilis na tumakas, na umano’y miyembro ng sindikato at malaking tulak ng shabu sa lugar ang nakilala sa mga alyas “Tom” at “Rex”, na residente rin sa nasabing lugar.
Batay sa ulat na isinumite ni Det. Anthony Boncan kay P/Sr.Insp. Esmael “Maying” dela Cruz, hepe ng Manila Police District-Crime Against Persons Investigation Section, dakong alas-10:00 ng umaga nang maganap ang nasabing krimen sa loob ng bahay ng biktima.
Natutulog ang biktima nang biglang pasukin ng dalawang suspect at pagbabarilin ng tatlong beses sa katawan.
Ayon kay Christine, 25, misis ng biktima, miyembro umano ng drug syndicate ang mga suspect kung saan hindi nakapag-remit ang kanyang asawa na isa namang ‘tulak’.
Nagpahayag din ng pangamba si Christine na posibleng sila naman ang balikan ng mga suspect kung kaya’t naghahanda na rin siyang lumipat ng ibang lugar.
Pansamantalang inilagak sa St. Yvan Funeral morgue para sa kaukulang awtopsiya.
- Latest
