56-anyos itinumba dahil sa onsehan sa droga

MANILA, Philippines - Patay ang isang 56-anyos na lalaki nang barilin ng  kanyang kalugar dahil umano sa onsehan sa droga sa Malabon City kahapon ng umaga.

Dead-on-arrival sa Tondo Medical Center sanhi ng mga tama ng bala sa katawan ang biktimang si Romeo Lumagbas “alyas Boy Banyo”, 56,  ng Phase 2, Brgy. Longos ng nabanggit na lungsod. Pinaghahanap naman ng mga pulis ang suspek na si Michael Ignacio, “alyas Bulag”, ng nabanggit ding barangay.

Ayon  sa pulisya, naganap ang insidente dakong alas-3:30 ng umaga habang nakatambay sa labas ng bahay ang biktima nang biglang sumulpot ang suspek at pinagbabaril ito.

Matapos ang insidente ay tumakas ang suspek habang dinala naman ang biktima ng kanyang mga kaanak sa nabanggit na lugar, subalit hindi na ito umabot nang buhay. Onsehan sa droga ang isa sa tinitingnang anggulo ng mga pulis dahil sangkot umano sa bentahan ng droga ang nasawi.