MANILA, Philippines - Arestado ang isang 19-anyos na kasambahay matapos umanong ilaglag ang sariling anak sa isang public comfort room sa Sta. Cruz, Maynila.
Batay sa inisyal na ulat, pumasok sa palikuran ng Obrero Market si alyas Anna, tubong Ormoc City.
Halos tatlong oras na umano siyang nasa loob ng banyo kaya’t pinilit siyang lumabas ng isang barangay tanod.
Dito na nakita na karga-karga ni Anna ang tinatayang pitong-buwang gulang na patay na sanggol na lalaki.
Ayon kay Rexil Olanga, comfort room attendant, narinig niyang may umiiyak na sanggol sa palikuran.
Duguan namang natagpuan ang pantalon ni Anna habang pilit na itinatago ang sanggol sa isang tuwalya.
Sinasabing naghanap pa ng basuharan ang batang ina.
Depensa naman ni Anna, hindi niya inilaglag ang sanggol. Hindi aniya inaasahan na sa banyo siya aabutan ng panganganak.
Isinugod na sa Ospital ng Sampaloc si Anna at dinala na sa funeraria ang kanyang anak.