Gipanguyaban og straight guy

Dear Tito Miguel,

Ako diay si  Regiel , usa ka gay ug nagpuyo sa Barangay Sambag 2 , Cebu City. Duna ko'y ka-char char nga  straight guy, guwapo  kaayo ug  ginganlan  kini og Alkie.  Nanguyab siya nako , apan wala pa nako gisugot kay nabalaka ko kay duna siya'y history nga naka-uyab pud og gay nga kalit niya nga gibiyaan nga wala'y klarong rason. Nahadlok ko nga basin mao sad na ang iyang buhaton dinhi kanako kun pananglitan ako siya nga sugton. Boutan ra baya si Alkie, ug dili gyud na siya mangayo og kuwarta dinhi kanako sanglit duna man siya 'y trabaho. Naganahan ra siya nako tungod sa gipakita nako nga pagpangga niya ug natagam na daw siya sa mga babaye kay gipasakitan ra siya.  Mangayo ko og tambag nimo Tito Miguel kung unsa ang angayan nakong buhaton, sugton o dili? — Regiel

* * *

Regiel,

Sugta na. Natural ra kun nahadlok ka buhaton kanimo ang iyang gibuhat sa lain kaniadto. Kay ang relasyon sugal, wala’y garantiya ang tanan. Ang angay nimong buhaton, ayaw pagdahom nga duna moy kaugmaon. Labi na kun siya straight, mangita gihapon na’g babaye sa umaabot. Maski nitagam na siya, moabot gihapon ang adlaw nga mosuway na sab siya og balik sa babaye.

Busa, tagamtama ang karon. Asa pa ka ana, guwapo man kaha, dili pa gyud manguwarta. Kun ang uban sama nimo mogasto’g mogukod sa lalaki, ikaw mao pay gipanguyaban. Pero lagi, ayaw pagdahom nga magdugay mo. Andama imong kaugalingon sa dakong posibilidad nga siya mausab. Samtang wala pa, pahimusli ang higayon. Gani kun imong sugton, unya mosuway pangayo’g kuwarta o huwam ba kaha, balibad ug palayo dayon. Dili maayo sagola’g kuwarta ang relasyon, mahisugamak ka sa konsumisyon.

Hunahunaa, kun dili nimo siya sugton karon, magsige lang ka’g pangutana’g handom, unsa kaha kun imo lang siya gisugot. Nagmalipayon ba kaha ka’g nagmalamposon? Anugon ang oportunidad. Apan kun imo sugton, pugngi imong kaugalingon nga mag-ilusyon. Nisugal ra ka, ayaw pagdahom nga modaog ka sa tanan higayon. Lagmit ka mapakyas, pero kun wala ka mag-ilusyon, sa kasakit dali ra ka maka-ikyas. —Tito Miguel

Magpatambag ka? Ipada kang Tito Miguel: 0991-318-9366