Anak sa dinakpan- Gula 7

Makaduha na nga gilitok ni Regner ang pulong I love you ngadto kang Zeny apan ang dalaga nagpabiling nagpakahilom. Wala motubag apan nakigtigi na kini sa pakighagkanay ni Regner.

Pagkataud-taud, nakamatngon si Regner nga misugod na paggakus kaniya si Zeny. Ingon sa anam-anam na nga nadutlan na sa kalalim sa ilang pagparayganay ug ni Regner.

Hinay-hinay na usab nga gibanlas sa grabeng kasibot si Regner nga ipadimdim pa kang Zeny ang katam-is sa pagmahal sa usa ka lalaki.

“Basin baya og maabtan ta ni Papa. Mokalit ra baya na siya og hapit kun gusto siya kay agianan man kining among balay sa rota sa Labangon,” daw mabalak-on si Zeny.

Naghinuktok si Regner ug milunga sa pagparayeg kang Zeny apan pabilin siya nga migakus sa dalaga. “Salamat nga mahal ‘sab diay ko nimo Zen. Kun mosugot ka, ikaw maoy akong minyoan,” matud ni Regner.

Kalit nga nahauknol si Zeny nga nakalitan sa iyang nadungog. Ingon sa dili siya makatuo. “Wala ko’y kabilinggan Zen ug pwede ko nga magpakasal nimo. Gusto ko nimo kay naanad ka sa kinabuhi nga pinobre ug makaantus ka sa kalisod,” matud sa traffic enforcer.

Misamot pagparayeg si Zeny ngadto kang Regner dihang nadungog niya ang gisulti sa ulitawo. “I love you,” matud ni Zeny nga sa unang higayon militok na sa maong mga pulong.

Nakapasugnib kini og dugang kasibot ni Regner sa pagparayeg kang Zeny. Giparaygan niya pag-usab ang dalaga, nag-ukobay na usab ang masi’g nila ka mga ngabil sa mas init na nga pagparayganay.

Lihok na kaayo ang mga kamot ni Regner nga nagpanghiram ug naghapuhap sa kalawasan sa dalaga. Panagsa makabantay usab si Regner nga mubawos sa paghapuhap kaniya si Zeny.

“Zen, pwede ba og manglakaw ta kadiyot lang kay kuyawan ko basin maabtan ta dinhi ni papa nimo,” giingnan ni Regner ang dalaga. Wala motingog si Zeny apan mitindog kini ug nagpasabot nga miuyon siya nga manglakaw sila.

Nakasabot na si Zeny unsay gusto nga mahitabo ni Regner sa ilang pagpanglakaw. Nahukman ni Zeny nga isalig na lang kang Regner ang iyang kaugmaon.

Nanakay dayon sila’g taksi ug nagpahatud sa mabugnaw nga dapit nga diha ra sa V. Rama Avenue. Didto sulod sa mabugnaw’ng lawak gitapuk-an dayon ni Regner ang maanyag nga dalaga. Wala gayud siya mag-usik og panahon.

Nag-abot ang ginhawa ni Regner kay nagpungasi ang mga hawok ug ubang matang sa iyang pagparayeg ngadto kang Zeny. Wala madugay, hingpit nga gisaw-an nila ang makabuhong nga kalipay.

“Bilyako ka g’yud kaayo Regner uy kay gidakup nimo ang akong papa unya ako giapil ‘sab nimo og dakup.”

“Mananghid ko ni papa nimo nga magpakasal ta Zen,” giingnan ni Regner ang dalaga. - Katapusan