Dear Dr. Love,
Napilitan akong lumiham sa iyo dahil wala na akong ibang mahihingahan ng aking problema liban sa iyo.
Hanga ako sa mga ginintuang payo mo sa mga may problema sa pag-ibig at kabilang po ako sa mga taong ibig humingi ng iyong advice.
Tawagin mo na lang akong Marla, isang accountancy graduate. Hindi n’yo naitatanong, dati akong GRO sa isang club.
Pangarap ko kasing makatapos ng pag-aaral at ‘yun lang ang paraan para matustusan ko ang aking pag-aaral dahil wala na akong mga magulang.
Nang ako ay GRO pa, may nakarelasyon akong matandang lalaki pero yaon ay magsasampung taon na ang nakararaan.
Ngayon ay may boyfriend ako pero nang ipakilala ako sa kanyang magulang ay nasindak ako dahil ang kanyang tatay ay ang lalaking nakarelasyon ko.
Pareho kaming nagulat at ito ang dahilan kung bakit nilayuan ako ng aking boyfriend. Masakit dahil ito’y isang pagkakamali na tila pagdurusahan ko habang ako’y nabubuhay.
Ano ang gagawin ko?
Gumagalang,
Marla
Dear Marla,
Masakit ang nangyari sa iyo pero mas makabubuting magkalayo kayo ng iyong kasintahan dahil mahirap tanggapin para sa kanya na ang mismong ama niya ay naging karelasyon mo.
Ang importanteng nangyari sa iyo ay naabot mo ang iyong pangarap. Huwag mong hayaan na masira ng mapait na alaala ang iyong buhay.
May mga magaganda pang pangyayaring mangyayari sa iyo kaya abangan mo na lang ang mga iyon.
Dr. LOVE