MANILA, Philippines — Maaring ilipat agad patungong Hague, Netherlands si dating Pangulong Rodrigo Duterte matapos itong maaresto ng International Police Organization (Interpol) kahapon ng umaga matapos lumapag sa NAIA Terminal 3 mula Hongkong.
Sinabi ni ICC Assistant to Counsel Kristina Conti, na ang isang tao na naaresto mula sa ICC ay dapat dalhin agad sa Hague, Netherlands sa lalong madaling panahon.
“A person arrested under a warrant of arrest from the ICC should be flown the Hague, Netherlands as soon as possible,” giit pa ni Conti.
Samantala, sinabi naman ni Foreign Affairs Secretary Enrique Manalo na walang direktiba sa kanila ang Philippine embassy sa Hague para dalhin doon si Duterte dahil sa kasong crimes against humanity.
“We have to see how the event would unfold,” ayon kay Manalo.
Hindi naman nagkomento si Manalo kung ano ang magiging papel ng DFA at sinabing walang kontak ang kanilang ahensiya sa ICC simula nang mag-withdraw ang Pilipinas dito mula sa Rome Statue.
Ayon naman kay Human rights lawyer Neri Colmenares, sa tatlong lugar posibleng ikulong o dalhin si Duterte sa oras na ilipad siya palabas ng bansa.
Si Colmenares ang nagsisilbing abogado ng mga biktima ng extrajudicial killings (EJK) sa drug war ng administrasyong Duterte.
“One pwede siyang makulong sa kustodiya ng ICC. Two, pwede sa third party. Or 3, sa the Hague mismo. Either of the 3 nasa poder ng ICC. It will be up to ICC where he will be detained,” paliwanag ni Colmenares.