MANILA, Philippines — Suportado ni Vice President Sara Duterte ang panukala ng kanyang kapatid na si Davao Rep. Paolo Duterte na gawing mandatory ang pagsasagawa ng random drug tests sa lahat ng elected at appointed government officials sa bansa, kabilang na ang Pangulo.
Sa isang ambush interview nitong Huwebes, sinabi ni Duterte na pabor siya dito upang matiyak na ang lahat ng public officials ng bansa ay nasa tamang pag-iisip, kasama na umano siya.
Ayon pa kay Duterte, pumayag na rin siya sa hiling ng ilang indibidwal na sumailalim siya sa drug test.
Sa ngayon ay inaayos na aniya ng kanyang kampo kung paano ito maisasagawa.
“Nababasa ko na yung panawagan ng mga tao at aayusin na lang natin kung kelan yun. Dapat may third party na kasali doon sa testing at hindi lang isa ang laboratory para sure tayong naba-validate yung results. Gawin natin yung drug test,” aniya pa.
Matatandaang sa ilalim ng House Bill 10744, na inihain ni Cong. Duterte, isasagawa ang random drug test gamit ang sample ng hair follicle ng opisyal ng pamahalaan.