MANILA, Philippines — Hindi prayoridad ng Senado ang pagpasa ng mga kontrobersiyal na Divorce at Death Penalty Bills, maging ang isinusulong na Charter Change, ayon kay Senate President Francis “Chiz” Escudero.
Pero nilinaw ni Escudero na magpapatuloy ang pagdinig sa mga nabanggit na panukalang batas at daraan ang mga ito sa normal na proseso.
Mas pagtutuunan ng pansin ang mga panukalang batas na maghahatid ng direktang benepisyo sa publiko.
Iiwasan din aniya ang mga panukalang nagdudulot ng pagkakawatak-watak at alitan sa pulitika.
Samantala, kinuwestiyon ni Escudero kung bakit may mga batas na magpapagaan sa pasanin ng mga malalaking negosyo pati ang papapadali sa pagbabayad ng tax at utang pero walang batas na magpapadali sa paghahanap ng trabaho.
Sa kabila aniya ng mga batas na makakatulong sa mga malalaking negosyante, wala namang batas na magpapagaan sa “commuting,” “connecting” at batas para mapadali ang pagtatapos sa pag-aaral at paghahanap ng trabaho.
“Bakit walang ease of acquiring justice? Bakit walang ease of providing food, not only food, but affordable food for our families,” ani Escudero.
Tiniyak din ni Escudero na mas pagtutuunan ngayon ng Senado ang pagpasa ng mga batas na magpapabuti sa buhay ng mga Pilipino.