MANILA, Philippines — Makakaranas ng malakas na pagbuhos ng ulan sa Metro Manila ngayong Lunes kasabay ng gaganaping ikatlong SONA ni Pangulong Ferdinand Marcos Jr.
Sa report ng PAGASA-Department of Science and Technology, ang ulan ay dulot na rin ng southwest monsoon o habagat na pinapalakas pa ng Tropical Storm Carina.
Nakatakdang mag-ulat sa bayan ang Pangulong Marcos sa Batasang Pambasang Complex sa Batasan Hills, Quezon City.
Inaasahan din na marami ang magsasagawa ng protesta sa mga kalsada sa paligid ng nasabing lugar.
Sa forecast ng PAGASA, makararanas ngayon araw ng panaka-nakang pag-ulan hanggang sa malakas sa Metro Manila, Ilocos Norte, Ilocos Sur, Abra, Pampanga, Bulacan, Rizal, Cavite, Batangas at Calamian Islands.
Mararanasan naman sa La Union, Pangasinan, Benguet, Zambales, Bataan, at Occidental Mindoro ngayong Lunes ang heavy to intense rains.