MANILA, Philippines — Nasa “hot water” ang tatlong miyembro ng gabinete ng dating Pangulong Rodrigo Duterte matapos madawit sa umano’y mga iregularidad.
Una rito, ibinunyag ni Pagcor Chair Alejandro Tengco sa Senate hearing kamakailan na si dating Presidential spokesman Sec. Harry Roque ay lumapit sa kanya para ipakiusap ang isang POGO site para maayos ang problema nito.
Ayon kay Tengco, noong July 2023, nagtungo umano si Sec. Roque sa PAGCOR para ayusin ang atraso ng Lucky South 999.
Si dating Economic Adviser Michael Yang naman ay ipinaaaresto na ng kongreso matapos dedmahin ang hearing ng kongreso sa dangerous drugs na sinasabing involvement nito sa drug bust sa Pampanga noong nakaraang taon.
Ayon kay House Chairman on Dangerous Drugs Rep. Robert Barbers, dakpin at dalhin sa kongreso si Yang para sagutin ang mga paratang laban sa kanya.
Samantala, si dating DBM USec. Lloyd Christopher Lao naman ay sinampahan na ng kasong graft ng Ombudsman sa Sandiganbayan dahil umano sa Pharmally overprice na medical supply noong kasagsagan ng COVID pandemic.
Una nang itinanggi ni Roque na naging legal counsel siya sa kahit na anong illegal POGO.