EOSY rites sa SY 2023-2024, itinakda ng DepEd sa Mayo 29-31
MANILA, Philippines — Itinakda na ng Department of Education (DepEd) sa katapusan ng Mayo ang End-of-School-Year (EOSY) Rites para sa SY 2023-2024.
Batay sa DepEd Memorandum No. 023, series of 2024, na inilabas nitong Mayo 2, itinakda ang pagsasagawa ng EOSY rites mula Mayo 29-31, 2024, kabilang rito ang graduation at moving up ceremonies.
Alinsunod sa naturang memorandum, nagpaalala rin ang DepEd na ang graduation at moving up ceremonies ay dapat na maging simple ngunit makahulugan.
“While these rites mark a milestone in the lives of the learners, gradution and moving up ceremonies shall be conducted without excessive spending extravagant attire, or extraordinary venues,” ayon pa sa DepEd.
Dagdag pa ng DepEd, ang mga non-academic projects, gaya ng pagdalo sa field trips, film showing, Junior-Senior Promenade at iba pang school events ay hindi rin dapat na gamitin bilang graduation o completion requirements.
Nagpaalala rin ang DepEd na hindi nila pinahihintulutan ang kanilang mga tauhan na mangolekta ng anumang kontribusyon o bayad para sa graduation o moving up ceremony.
Upang matiyak naman ang kaligtasan at proteksiyon ng mga mag-aaral, guro at mga attendees, pinayuhan rin ng DepEd ang mga paaralan na idaos ang mga naturang aktibidad sa indoor venues, na may proper ventilation, o covered courts upang maiwasang mabilad sa matinding init ng panahon.
- Latest
