3 research vessel ng China umalis na sa Ayungin Shoal

MANILA, Philippines — Matapos ang kaduda-dudang presensiya, nilisan na ng tatlong research vessel ng China ang Ayungin Shoal sa pinagtatalunang teritoryo sa West Philippine Sea (WPS).

“Yung three other research vessels were found to be just passing by , oo so these are research vessels pero hindi sila the same as Shen Kuo, hindi sila nagtagal at hindi rin sila ganun ‘yung movement , so they have a different path from this fourth one,” pagkumpirma ni AFP spokesperson Col. Francel Margareth Padilla.

Noong Martes ay inireport ni Commodore Roy Vincent Trinidad, tagapagsalita ng Phl Navy na namonitor ang presenya ng tatlong nasabing barko ng China na umaaligid sa Ayungin Shoal.

Ang Ayungin Shoal ang hinihimpilan ng nabalahurang BRP Sierra Madre na kanlungan ng mga tropang sundalo ng bansa na nagtatanod sa mga pag-aaring isla ng Pilipinas sa naturang teritoryo na inaagaw ng China.

Hinggil naman sa Shen Kuo Research vessel ng China, sinabi ni Padilla na paikot-ikot pa rin ito at pa-zigzag ang galaw ng barko kaya nagsagawa ang Philippine Navy personnel ng radio challenge.

Noong Martes ang Shen Kuo Research vessel ay huling namataan sa karagatan ng Sulat, Eastern Samar noong Abril 30 matapos itong unang mamonitor sa karagatan ng Rapu-Rapu, Albay noong Abril 25.

Base pa sa report, noong Abril 28 ay naispatan ang nasabing Chinese research vessel sa karagatan ng Catanduanes kung saan may ibinaba umano itong mga kagamitan.

Samantala nitong Abril 29, ang Shen Kuo ay namonitor naman sa bisinidad na nasa 44.6 nawtikal na milya sa hilagang silangan ng Gamay, Northern Samar.

“We have been sending maritime patrols regularly to monitor the activity of this vessel, our maritime patrol is still ongoing,” sabi pa ng opisyal.