MANILA, Philippines – Nagpakasal na kamakalawa si Sen. Aquilino “Koko” Pimentel III sa girlfriend nitong si chef Kathryna Yu sa isang civil wedding na ginawa sa Coconut Palace sa Manila.
Ang seremonya ay pinangunahan ni Supreme Court Senior Associate Justice Antonio Carpio.
Tumayo naman bilang isa sa mga principal sponsor o ninong si Pangulong Duterte.
Kapwa magkasama sa PDP-Laban sina Duterte at Pimentel.
Bukod kay Duterte, principal sponsors din sina Senate President Vicente Sotto III at asawang si Helen Gamboa-Sotto, Sen. Manny Pacquiao at misis na si Jinkee, Davao del Norte Rep. Pantaleon Alvarez, Leyte Rep. Yedda Marie Romualdez at Special Assistant to the President Christopher Go.
Dumalo rin sa okasyon ang mga kasamahan ni Pimentel sa majority block na sina Senators Cynthia Villar, Juan Miguel Zubiri, Sonny Angara, JV Ejercito, Sherwin Gatchalian, Gregorio Honasan, Loren Legarda at Joel Villanueva.
Unang ikinasal si Pimentel kay Jewel May Lobaton at na-annulled noong Enero 2017.