MANILA, Philippines — Kabuuang 81,701 seniors ang sinasabing nakinabang sa ipinatupad na libreng sakay ng Metro Rail Transit Line 3 (MRT-3) noong nakalipas na isang linggo.
Ayon sa pamunuan ng Department of Transportation (DOTr) malaking bagay para sa mga senior citizens ang libreng sakay ng MRT-3 na bahagi ng pagdiriwang ng ‘Elderly Filipino Week’.
Nagsimula ang libreng sakay ng MRT-3 sa mga matatanda noong Oktubre 1 hanggang 7 bilang pagpupugay sa mga senior citizen.
Ang libreng sakay ay ipinatupad sa buong operating hours ng mga tren ng MRT-3.
Maliban sa MRT-3, nagkaloob din ng libreng sakay para sa mga nakatatanda ang pamunuan ng Light Rail Transit Line 2 (LRT-2) sa loob ng isang linggo.
Ang MRT-3 ay bumibiyahe sa kahabaan ng Epifanio delos Santos Avenue (EDSA) mula North Avenue, Quezon City hanggang Taft Avenue, Pasay City.