MANILA, Philippines - Posibleng mapaaga at maipoproklama na sa Mayo 31 ang mananalong Presidente at Bise Presidente.
Ayon kay Senador Koko Pimentel, chairman ng joint canvasing committee sa Kongreso, kung magtutuloy-tuloy ang mabilis na proseso ng bilangan ay matatapos nila ang canvassing hanggang ngayong Biyernes.
Sa tingin ni Pimentel, wala namang mabibigat na problema na maaaring harapin ang NBOC na kailangan ng matagalang imbestigasyon. Bagama’t nagkaroon aniya ng mga kaunting problema tulad ng nangyari sa certificate of canvass (COC) sa Laguna na na-deferred noong unang gabi dahil lang sa discrepancy ay nabilang din agad ito kinabukasan.
Sa sandaling maaprubahan ng joint session ang kanilang report, mag iisyu ang Senado at Kamara ng resolusyon para maiproklama na ang mga nanalo.
Samantala, pinuna ng kampo ni Senator Ferdinand “Bongbong” Marcos ang mataas na bilang ng “undervotes” para sa vice presidential race sa unang araw ng pagbibilang ng certificates of canvass.
Ayon kay Atty. George Garcia, abogado ni Marcos, mula sa COCs na binuksan ng joint canvassing committee ng National Board of Canvassers (NBOC), may malaking difference sa mga boto para sa posisyon ng presidente at bise presidente.
“We have accounted undervotes your honor, that’s totaling the votes cast for the Vice President vis-à-vis the votes cast by the voters, it would appear that such number was discovered from the COC’s your Honor that totals 623, 174,” ani Garcia.
Naitatala ang ‘undervotes’ sa balota kung ang isang botante ay hindi bomoto para sa isang partikular na posisyon o kung kulang ang boto nito.
Nagpahayag ng pagkabahala ang kampo ni Marcos sa naitalang ‘undervotes’ para sa vice presidential race na nadiskubre umano nila sa isinagawa nilang quick counts.