PNoy, nag-drive ng sports car pa-Baguio

MANILA, Philippines – Muling naranasan ni Pangulong Aquino na magmaneho ng paborito nitong sports car matapos mamataan na pumanik ito ng Baguio City pagkatapos ng Bagong Taon kung saan siya mismo ang nagmaneho mula Tarlac hanggang sa Pines City.

Ayon sa source, minaneho ng Pangulo ang isang Nissan GTR Coupe red sports car.

Mahilig sa mga sports car si PNoy at natigil lamang ito sa pagda-drive ng maging pangulo ng bansa.

Sinabi naman ng isang source, habang nasa Baguio City ito ay namataang minamaneho naman nito ang isang Audi sports car.

Wala sa official schedule ng Pangulo na pumanik ng Pines City at wala ring advisory ang Palasyo sa Malacañang reporters kaugnay sa schedule nito.

Magugunita na may 2 taon na ang nakakaraan ng mamataan ding humaharurot na nagmamaheo ng Hyundai Genesis sports car ang Pangulo sa bagong TPLEX papanik ng Baguio City upang dumalo naman sa PMA graduation bukod sa paggamit nito ng Porsche sports car na ibinenta umano dito ni Manny Dimaculangan may ilang taon na ang nakakaraan.