MANILA, Philippines – Dead on the spot ang isang 36- anyos na caretaker/helper nang pagbabarilin ng dalawang lalaki habang natutulog sa loob ng compound ng Funeraria Cruz sa Tondo, Maynila, kahapon ng madaling araw
Tadtad ng tama sa katawan ang biktimang si Divino Jimenez, residente ng Lico St., Tondo, Maynila, empleyado ng R. De Castro Funeral Homes.
Sa ulat ni PO3 Dennis Turla ng Manila Police District-Homicide Section, dakong ala-1:00 ng madaling araw ng kahapon nang maganap ang insidente sa receiving area sa compound ng nasabing punerarya.
Nabatid na apat na kasamahan sa trabaho ang kasamang natutulog ng biktima kabilang ang kaniyang kalive-in na si Vanessa nang maganap ang pamamaril.
Umalingawngaw ang sunud-sunod na putok ng baril na nang mapawi ay nakita nang duguan ang biktima. Dalawang lalaki ang nakitang tumakas sakay ng motorsiklo.
Blangko pa ang pulisya sa motibo sa krimen habang patuloy pa rin ang isinasagawang imbestigasyon ng pulisya.