MANILA, Philippines – Nagtalaga na ng piskal na hahawak sa mga kaso ng mga biktima ng ‘tanim’bala’ sa Ninoy Aquino International Airport (NAIA).
Ayon kay Justice Undersecretary at Spokesperson Emmanuel Caparas, isang piskal kada araw ang nakatalaga sa NAIA na hahawak sa lahat ng mga kaso mula Terminal 1 hanggang Terminal 4. Lahat ng mahuhulihan ng bala sa paliparan ay sasailalim pa rin sa inquest proceedings.
Pero kung sa tingin ng piskal ay mukhang inosente ang nahulihan ng bala batay sa sirkumstansya ng insidente, maaring magpasya ang piskal na palayain pansamantala ang respondent pero isasailalim ito sa full-blown preliminary investigation.
Nangangahulugan lamang na kung idedeklara na released for further investigation ang respondent, maaari siyang makahabol sa kanyang byahe dahil kailangang madaliin ang pagpapalabas ng resolusyon.
Sa ganitong pagkakataon, kailangang ipaalam sa respondent na kailangan niyang dumalo sa preliminary investigation, pero desisyon pa rin ng respondent kung siya ay lalahok sa imbestigasyon, dahil ang kaso ay maari namang desisyunan kahit walang partisipasyon ang respondent sa mga pagdinig sa piskalya.
Maaari ding ipasya ng piskal na ibasura ang reklamo.