MANILA, Philippines – Hindi na raw paiimbestigahan ni Sen. Grace Poe ang ilang black propaganda laban sa kanya.
Kamakalawa ay nakatanggap ang mga reporter sa Senado ng isang press release na sinasabing umaatras na raw si Poe bilang kandidatong presidente.
Ang email na natanggap ng mga reporter ay nagmula sa email address na <grace_poe16@yahoo.com>.
“Kakatwa na ayaw imbestigahan ni Senador Poe ang insidente sa email na iyon,” pagtataka naman ni Daang Matuwid coalition spokesperson at Akbayan Rep. Barry Gutierrez.
Ilang beses ng umalma si Poe sa mga isyung ibinabato sa kanya at sinasabing desperado ang mga kalaban nito sa pulitika.
“Pagkatapos umangal ng foul tuwing merong isyung ibinabato sa kanya, lehitimo man o hindi, parang tinatakasan niya ang oportunidad na hubaran ang mga nasa likod ng black propaganda,” puna ni Gutierrez. “Palaging ang Liberal Party ang laging naituturo ng kampo ni Poe, ang partido ng administrasyong Aquino at ng pambato ng Daang Matuwid Mar Roxas. Baka kuntento na si Poe sa atensyon at media na dulot ng pagtuturo sa LP?”