MANILA, Philippines – Tatlo na sa dating miyembro ng Senado ang pumanaw ngayong 2015 kung saan ang pinakahuli ay si dating Senator Ernesto “Boy” Herrera.
Alas-2 ng hapon noong Huwebes ng bawian ng buhay ang 73-anyos na senador sa Manila Doctors Hospital pero hiniling ng pamilya sa ilang miyembro ng Senate media na nakaalam kaagad ng balita na huwag muna itong isiwalat sa publiko hangga’t hindi naipapaalam sa kanyang asawa na mayroon ring karamdaman.
Bukod kay Herrera, pumanaw din ngayong taon sina dating Senator Agapito “Butz” Aquino nitong Agosto 17 at si Sen. Joker Arroyo noong Oktubre 5.
Sinabi ni Senate President Franklin Drilon na nakikiisa ang Senado sa pagluluksa sa pagpanaw ni Herrera na isang kilalang union leader.
Karangalan aniya ni Drilon ang makatrabaho si Herrera na may prinsipyo at isang katangi-tanging public servant.