Pagtatago ng bigas HCPTI pinasisiyasat sa NFA

MANILA, Philippines – Mahaharap sa patung-patong na kaso ang Harbour Center Port Terminal Incorporated (HCPTI) bunsod umano ng pagtatago nito ng bigas ng National Food Authority (NFA) ng walang  permit.

Ito naman ang binigyan diin ni National Coalition of Filipino Consumers (NCFC) spokesperson BenCy Ellorin kasabay ng kahilingan ng mga ito sa NFA na siyasatin ang alegasyon na nagtatago ng tone-toneladang NFA rice ang HCPTI.

Ayon sa grupo, kailangang kumilos ang NFA dahil maliwanag na paglabag ito sa government rules. Kung saan tanging ang mga NFA-accredited warehouses ang pinapahintulutang magtabi ng bigas.

Nakasaad na paglabag  ang ginawa ng  HCPTI sa Republic Act No. 7581, o ang  Price Act Law, na may parusang  pagkakakulong ng  lima hanggang 15 taon  bukod pa sa pagkakatanggal ng  accreditation at paglalagay sa blacklist.

Sinabi pa ng NCFC na nakatanggap sila ng  report na ang warehouse ng HCPTI ay may nakaimbak na  NFA rice sa kabila ng kawalan ng accreditation  mula sa NFA. Nangangamba din ang grupo na posibleng ginagamit ang HCPTI ng mga smuggler upang manipulahin ang presyo ng  bigas sa merkado.