SANTIAGO CITY, Isabela, Philippines – Tatlo-katao na pinaniniwalaang notoryus na holdaper ang nasakote sa inilatag na operasyon ng mga operatiba ng pulisya sa bayan ng Cordon, Isabela kamakalawa.
Pormal na kinasuhan ang mga suspek na sina Dino Balajo, 29; Lipad Gali-Om, 35; at si Lando Gumitang, 45, mga residente sa Barangay Dallao sa nabanggit na bayan.
Napag-alaman na dakong alas-8 ng gabi nang holdapin ng mga suspek ang Shell Amancio Gasoline at Amancio Hotel sa Barangay Tarinsing kung saan dinisarmahan pa ang guwardiya.
Agad namang humingi ng tulong ang ilang staff ng establisyemento sa mga awtoridad para habulin ang mga suspek na sakay ng dalawang motorsiklo na walang plaka.
Nasukol naman ang mga suspek sa Barangay Rizaluna sa nabanggit na bayan kung saan narekober ang tatlong cal. 38 revolver, dalawang cal. 45 pistol, P1,770 cash, 2 cellphones at dalawang motorsiklo na ginamit ng tatlo.