Granada pinasabog: 3 sasakyan napinsala
MANILA, Philippines - Tatlong sasakyan ang napinsala nang masabugan ito ng isang granada na inihagis ng isang hindi kilalang rider, kahapon ng madaling araw sa Makati City.
Ang mga sasakyang napinsala ay isang Ford Focus, ( GRO-208), Hayundai Coaster (AAA-2079) at Isuzu Van (PDI-997).
Sa report na natanggap ni Senior Supt. Ernesto Barlam, hepe ng Makati City Police, naganap ang insidente alas-2:29 ng madaling-araw, sa Urban Avenue, Brgy. Pio Del Pilar ng naturang lungsod.
Base sa kuha ng CCTV camera ng isang condominium, dumaan ang isang motorsiklo na hindi naplakan sakay ang isang lalaki at inihagis nito ang isang granada na sumambulat sa mga sasakyan na nakaparada lamang sa naturang lugar.
Ayon sa pulisya, mabuti na lamang aniya ay walang taong nadamay sa insidente.
Matapos ang pagsabog ay mabilis na tumakas ang suspek.
Tinitingnan ng pulisya ang anggulong, posibleng ang target ng suspek ay isa sa mga may-ari nang sasakyan na hindi na binanggit pa ang pangalan.
Sa ngayon ay nagsasagawa ng malalimang imbestigasyon ang pulisya hinggil sa insidente.
- Latest
