MANILA, Philippines - Hiniling kahapon kay Liberal Party standard bearer at DILG Sec. Mar Roxas na ideklarang free-zone ang Sta. Rosa City, Laguna sa darating na 2016 elections dahil maraming aspirante sa pagiging alkalde nito ang miyembro ng LP.
Sinabi ni Emmanuel Mateo ng Center for Anti-Graft and Corruption Prevention Inc. (The Center), upang masiguro ni Roxas ang ‘panalo’ sa Sta. Rosa City ay dapat ideklara na lamang nitong ‘libre-sona’ ang lungsod sa darating na 2016 elections.
Idinagdag pa ng The Center, kapag mayroong piniling LP candidate si Roxas sa Sta. Rosa City ay magpupunta sa ibang partido ang hindi nito mapipili.
“It will be a big loss of votes for the LP,” wika ni Mateo.
Kabilang sa mga aspirante sa mayoralty race ng Sta. Rosa City sa 2016 sina Vice Mayor Arnel DC Gomez, Congressman Danilo Ramon S. Fernandez at Celso O. Mercado na pawang miyembro ng LP.
Dagdag ni Mercado, kung dadaanin sa equity of incumbent rule ay dapat si VM Gomez ang piliin ng LP dahil siya ang bise-alkalde ng outgoing Mayor Arlene Arcillas na tatakbo namang kongresista sa 5th district ng Laguna.
Pero kung idedeklara na free-zone ang Sta. Rosa City ay magiging win-win solution ito para sa kanya at maging sa mga kandidato upang mabura ang ‘palakasan system’.