MANILA, Philippines – Patay ang polio victim na barangay treasurer nang pasukin umano ng magnanakaw at pagsasaksakin sa loob ng kaniyang bahay, sa Quiapo, Maynila, kamakalawa ng gabi.
Duguang nakahandusay at wala ng buhay ang biktimang si Arlene Mediavilla, 39 ng Barangay 390 Zone 40, District 3 at residente no.913 R. Hidalgo st., Quiapo nang madatnan ng isang Sarah Torres, kaibigan ng biktima.
Sa ulat ni PO3 Bernardo Cayabyab ng Manila Police District-Homicide Section, dakong alas 9:45 ng gabi nang magtungo si Torres sa bahay ng biktima upang makipagkuwentuhan nang masorpresa na kalat-kalat ang mga kagamitan habang ang biktima ay nakahandusay na naliligo sa sariling dugo.
Ayon pa sa ulat, wala ni isang kapitbahay ang nakarinig ng anumang komosyon mula sa bahay ng biktima kaya walang makuhang testigo sa insidente.
Hinihinalang pinagnakawan ang biktima na pinatay din nang manlaban.