Kahalagahan ng bigas ituturo sa mga estudyante

MANILA, Philippines - Nais ng Department of Education (DepEd) na matutuhan ng mga mag-aaral ang kahalagahan ng pagtitipid ng bigas.

Ito’y kasunod na rin ng ulat na mahigit sa P7 bilyong halaga ng bigas ang nasasayang lamang taun-taon.

Kaugnay nito, hinimok ng DepEd ang lahat ng public at private schools sa buong bansa na makiisa sa mga aktibidad para sa National Rice Awareness Month ngayong Nob­yembre.

Alinsunod sa memorandum ni DepEd Sec. Armin Luistro, ang mga aktibidad para sa nasa­bing pagdiriwang ay dapat na maituro sa mga estud­yante ang hirap ng mga magsasaka sa pagtatanim at pag-ani ng palay.

Inihayag pa ng kalihim ang findings ng Philippine Rice Research Ins­titute (PhilRice) na ang bawat isang Pinoy ay nagsasayang ng siyam na gramo o dalawa hanggang tatlong kutsarang bigas araw-araw, na katumbas ng pagkain ng may 2.5 milyong tao sa loob ng isang taon.

Kalimitan aniyang nasasayang ang bigas kung labis-labis ang isinasaing, isinisilbi at hindi kinakain kaya’t natatapon lamang.

Ayon kay Luistro, la­yunin ng month-long activities na isulong ang “rice-ponsibility” sa bawat Pinoy.

Hinikayat din ng kalihim ang lahat ng department officials, employees, mga guro at mga mag-aaral sa public at private schools sa buong bansa na maglunsad ng information campaigns hinggil sa bigas at i-recite ang “Panatang Makapalay”o Rice Pledge sa pagtatapos ng flag-raising ceremony tuwing umaga ng buwan ng Nob­yembre.