MANILA, Philippines - Isinusulong ng isang mambabatas ang pagbibigay ng 20 porsiyentong diskwento sa terminal fees para sa senior citizens.
Paliwanag ni Bacolod City Rep.Evelio Leonardio, hindi dapat maging masyadong magastos ang pagbisita ng mga senior citizens sa mga tourist spots tulad ng Boracay sa Aklan, Chocolate Hills sa Bohol o Mayon Volcano sa Albay.
Aamyendahan ng House Bill 4697 ang Section 4 (a) ng Republic Act No. 7432, o “Expanded Senior Citizens Act of 2010.”
Sa ilalim nito, ang mga senior citizens ay bibigyan ng 20% diskuwento sa booking transportation fare sa mga domestic air transport services at barko subalit hindi kasama ang passenger terminal fees.
Makakatulong sa mga senior citizens ang pagsama sa passenger terminal fees sa listahan ng discounted fees.
Bukod dito, makakatulong din ito sa turismo ng bansa sa pagsusulong ng discounted local travel sa seniors.