MANILA, Philippines - Hindi muna gagamitin ang iba pang combat utility helicopter ng Philippine Air Force (PAF) matapos bumagsak ang isang kahalintulad na chopper kamakalawa.
Nitong Huwebes ng hapon ay bumagsak ang isang Sokol helicopter na nagsilbing back-up nina Defense Secretary Voltaire Gazmin, DILG Sec. Mar Roxas at Energy Sec. Jerico Petilla, tatlong minuto matapos magtake-off sa Camp Ranao, Marawi City.
Wala namang malubhang nasugatan sa insidente pero ipinagtataka kung bakit nagkaaberya ang helicopter gayong bagong bili ito.
Nabatid na ang naturang chopper ay bahagi ng walong brand new combat utility choppers na binili sa Poland at kabilang sa first batch na nai-deliver nitong 2012.
Inutos na ni AFP Chief of Staff Gen. Gregorio Pio Catapang Jr. na magsagawa ng imbestigasyon.