Paliwanag ni Mayor Calixto sa Mla. Bay reclamation hingi

MANILA, Philippines - Nakahanap ng kakampi ang Pasay City Council sa ginawa nilang pagbawi sa P54.5 bil­yong Manila Bay reclamation contract makaraang pagpaliwanagin ng Philippine Reclamation Authority (PRA) si Mayor Antonino Calixto.

Sa liham na may petsang Disyembre 10 at pirmado ni PRA General Manager Peter Anthony Abaya, hiniling nito kay Calixto na kumuha ng legal opinion sa Department of Justice (DOJ) at Department of the Interior and Local Government (DILG) dahil sa pagkontra ng mga miyembro ng Sangguniang Panglungsod sa pinasok na kontrata ng pamahalaan ng Pasay kaugnay sa pag-reclaim at pagdebelop sa 300 ektarya ng Manila Bay.

“May we state for the record that the PRA is not in a position to conduct a legal review of the Pasay City Council Resolution as this falls under the jurisdiction of either the DILG or the DOJ. This is precisely why this Authority is requesting the City to secure a validating legal opinion form the said agencies which have oversight functions over LGUs,” ayon sa liham ni Abaya.

Pinaalala rin ng PRA kay Calixto na may sinusundan na silang protocol na nangangaila­ngan ng rekomendasyon ng NEDA Board sa lahat ng reclamation projects base sa panuntunan ng NEDA Infrastructure Committee.

Una nang pinanindigan ng Pasay City Council ang kanilang resolusyon na bumabawi sa kontrata. Sinabi ni Councilor Richard Advincula na maaari lamang itong makuwestiyon sa korte. Tanging ang proseso sa pagpili lamang umano ang kanilang kinukuwestiyon at hindi ang kontrata sa reklamas­yon na magdadagdag sa ekonomiya ng lungsod.