MANILA, Philippines - Kapwa nasawi ang tsuper at ang pasaherong babae nito makaraang magkayupi-yupi ang sinasakyang taksi na sumalpok sa isang posteng bakal sa Mandaluyong City kamakalawa ng gabi.
Nagtagal pa bago natanggal sa nawasak na taxi ang mga biktimang sina Joshua Mag-aso, 26, ng F. Ortigas St., Mandaluyong City; habang patuloy namang inaalam ang pagkakakilanlan sa nasawing babae na tinatayang nasa 5 talampakan ang taas, nasa pagitan ng edad 20-25 anyos, maputi, nakasuot ng itim na sando, maong na pantalon at abuhing sapatos.
Sa ulat ng Mandaluyong Police-Traffic Unit, naganap ang insidente dakong alas-2 ng madaÂling araw sa kahabaan ng Shaw Boulevard malapit sa Pilar Street sa naturang lungsod.
Ayon sa isang saksi, napakabilis umano ng takbo ng Crown taxi na minamaneho ni Mag-aso nang mawalan ng kontrol at sumalpok sa posteng bakal dahilan para magkayupi-yupi ang sasakyan.
Rumesponde naman ang mga tauhan ng Mandaluyong Rescue Unit ngunit natagalan bago matanggal sa pagkaka-ipit sa loob ng sasakyan ang dalawang biktima.