MANILA, Philippines - Naikabit na uli ang Albay Electric Cooperative (Aleco) sa Luzon power grid at nagka-ilaw na muli ang Albay pagkatapos ng mahigit na 24-oras na blackout sa pakikipag-ugnayan na rin ni Albay Gov. Joey Salceda. Pero sa kabila nito ay hindi pa tapos ang krisis ng lalawigan.
Pinaputulan ng Philippine Electricity Market Corporation (PEMC) at ng National Grid Corporation of the Philippines (NGCP) ang Aleco noong Martes dahil P48 milyon lamang ang binayaran sa P67 milÂyon isang buwang konsumo nitong kuryente. Dapat bayaran pa nito ang natitirang P19 milyon at kung hindi, ito’y puputulan uli.
Tinulungan ang Aleco ni Gov. Salceda na nakiusap kay Energy Secretary Jericho Petilla para mabalik muna ang kuryente at higit diumanong mabuti ang nakuha niyang kundisyon dahil ang P1-bilyong utang ng koopeÂratiba sa PEMC ay maaari nang bayaran sa loob ng 10 taon.
Ang P3-bilyong utang naman ng Aleco sa PSALM (Power Sector Assets and Liabilities Management Corporation), na ipinasa lamang ng Napocor (National Power Corporation) sa kooperatiba ay babayaran sa mahabang termino. Ipinanukala niyang putulan na rin ng kooperatiba ang mga 100 mga negosyong gumagamit ng kuryente ngunit hindi nagbabayad.
Nilinaw din ni Salceda na hindi ang Albay provincial government ang nagpapatakbo at may-ari ng Aleco, gaya ng akala ng ilan.