MANILA, Philippines - Ang Metro Manila, ang mga rehiyon ng Ilocos at Cordillera, Gitnang Luzon, CALABARZON at ang lalawigan ng Palawan ay makakaranas ng maulap na papawirin na may mahina hanggang sa katamtamang pag-ulan at pagkidlat-pagkulog. Ang natitirang bahagi ng bansa ay magiging bahagya hanggang sa maulap na may pulu-pulong pag-ulan o pagkidlat-pagkulog lalo na sa dakong hapon o gabi. Katamtaman hanggang sa malakas na hangin mula sa timog-kanluran hanggang timog ang iiral sa kanlurang bahagi ng Luzon at mula naman sa timog-silangan hanggang timog sa nalalabing bahagi ng Luzon. Ang baybaying-dagat sa mga lugar na ito ay magiging katamtaman hanggang sa maalon. Sa ibang dako, ang hangin ay magiging mahina hanggang sa katamtaman mula sa timog-silangan hanggang timog na may banayad hanggang sa katamtamang pag-alon ng karagatan. Sisikat ang araw bandang alas-5:26 ng umaga at lulubog bandang alas-6:28 ng gabi.