Pinay nurse utas sa bangga

MANILA, Philippines - Isang Pinay nurse ang nasawi habang lima pang kasamahan nito ang nasugatan sa isang road accident sa Saudi Arabia.

Ayon sa Arab News, namatay habang ginagamot sa King Khaled Hospital sa Al Kharj, may 77 kilometro ang layo sa timog ng Riyadh, si Emma Eleterio, nurse sa Prince Salman Hospital sa Saudi Arabia at tubong General Santos.

Kabilang sa 15 katao na sugatan ay ang mga kasamahan ni Eleterio na sina Jennifer Tambag, Alicia Dave, Liliosa Balidiosa, Mae Mandrez at Bernadeth Chavez.

Nabatid sa report, habang patungo ang mga biktima sa pangunahing palengke ng Kharj City para sa weekend shopping trip noong Huwebes nang banggain sa likod ang kanilang sinasak­yang bus ng isang humaha­rurot na sasakyan hanggang sa bumangga sila sa isang road divider at dumiretso sa opposite lane.

Ang mga labi ni Ele­terio ay nasa mortuary ng King Khaled Hospital at inaasahang maiuuwi sa Pilipinas.

Nagtungo sa Saudi si Eleterio at nagtrabaho doon bilang nurse sa loob ng 9 taon.