Ex-convict nga bag-ohay namusil, nakapusil na sab
CEBU, Philippines — Nalandig sa tambalanan ang usa ka 38-anyos nga lalake nga gipusil sa usa ka ex-convict nga gipangita sa kapulisan kay nakapusil sab sa miaging adlaw sa Sitio Jansen, Barangay Basak San Nicolas, dakbayan sa Sugbo kagahapon sa kadlawon, Enero 9, 2025.
Ang biktima mao si Jaymar Balanay Obaob, 38, nagpuyo sa naasoy nga dapit samtang ang suspek mao si Giovanni Aniscal Gabor alyas Jojo ug alyas Ramil Abellar, 42, residente sa Alaska Proper, Barangay Mambaling ning siyudad.
Sa impormasyon sa kapulisan ang biktima nagsakay og motorsiklo ug padung na mouli sa ilang panimalay dihang kalit lang nibutho ang suspek ug gipusil ang biktima makadaghang higayon.
Ang suspek daling misibat samtang ang biktima gidala dayon sa tambalanan human makaangkon og samad pinusilan. Personal grudge matod pa ang motibo sa maon krimen.
Kahinumduman nga niadtong Domingo sa hapon, Enero 5 patay sa pagpamusil si Roell Capablanca Chua alyas Ikong, 33, human gipusil ni Gabor .
Sa impormasyon sa Mambaling Police Station 11 Cebu City Police Office ang suspect nipalit og illegal nga drugas kang Chua ug sa laing kauban niini.
Apan giingong nasuko ang suspek kay wala gihatag ang shabu nga iyang gipalit hinungdan nga nagkapinusilay ang grupo ni Chua ug si Gabor. IBM BANAT NEWS
- Latest
