Pac-Yao nagkasama sa China

MANILA, Philippines – Nagkasama ang dalawang sports icon ng Asya na si boxing superstar Manny Pacquiao at dating NBA player na si Yao Ming sa Shanghai, China nitong Miyerkules.

Tumungo ang fighting congressman ng China upang i-promote ang kanilang laban ni Brandon Rios na gagawin sa Nobyembre 24 sa Venetian Macao sa Macau.

Kasama sa larawan ng 5-foot-6 na si Pacquiao ang makakatunggaling at mas matangkad ng kaunti na si Rios, 5-foot-9, at ang 7-foot-6 na si Yao na dating naglaro para sa Houston Rockets.

Bukod sa China, tutulak din patungong Singapore, New York at Los Angeles sa Amerika sina Pacquiao at Rios para sa kanilang worldwide promotional tour.

Matapos ang walong season sa NBA ay nagretiro si Yao noong 2011.

Nitong Mayo lamang ay bumisita si Yao sa Pilipinas kasama ang kanyang koponan na Shanghai Sharks na nakipagtuos sa isang friendly match kalaban ang national team na Gilas Pilipinas.