P1.2M na shabu nakumpiska sa Las Piñas

MANILA, Philippines - Timbog ang isang babae matapos mahulihan ng P1.2 milyong halaga ng droga sa buy-bust operation ng Philippine Drug Enforcement Agency (PDEA) sa Las Piñas City.

Sinabi ni PDEA chief Arturo Cacdac Jr. ngayong Martes na nasakote ng mga awtoridad nitong Hulyo 12 si Pejay Madeja, 28, ng Sampaguita Street, Bagong Sibol, South Greenheights, Barangay Putatan, Muntinlupa City.

Nadakip si Madeja matapos pagbentahan ang isang undercover agent ng PDEA bandang 6:30 ng gabi sa loob ng isang kilalang shopping mall sa Las Piñas.

Nabawi mula sa suspek ang 241.4 gramo ng shabu na nakabalot sa brown envelope at bubble wrap at cellphone.

Nasa kustodiya na ng PDEA sa Quezon City si Madeja ba nahaharap sa kasong pagtutulak ng droga.