MANILA, Philippines – Sugatan ang isang publisher ng isang lokal na pahayagan ngayong Martes ng umaga matapos tambangan ng mga armadong kalalakihan sa Sta. Barbara, Pangasinan.
Nakilala ang biktima na si Jaime Aquino, publisher ng Northern Star.
Nagbabasa ng diyaryo sa waiting shed si Aquino nang pagbabarilin siya ng tatlong lalaking sakay ng isang motorsiklo.
Nakatakbo si Aquino sa nakaparada niyang sasakyan 10 metro ang layo sa waiting shed habang pinapaputukan ng mga salarin.
Isinugod si Aquino sa Villaflor Doctors Provincial Hospital sa Dagupan City matapos itong tamaan sa likod.
Nahaharap si Aquino sa kasong murder kaugnay sa pagpaslang kay Infanta Mayor Ruperto Martinez noong Disyembre 2012. Kasama niya bilang akusado sina Pangasinan Gov. Amado Espino Jr. at Pangasinan Rep. Jesus Celeste.