MANILA, Philippines – Dalawang bata ang nalunod matapos anurin ng rumaragasang baha mula sa Pulangi River sa Pagalungan, Maguindanao nitong Martes dahil sa walang tigil na pagbuhos ng ulan.
Narekober ng mga awtoridad ang palutang-lutang na bangkay ng dalawang biktima matapos ang limang oras na paghahanap. Kapwa katutubong Maguindanaon ang mga biktima na anim-na-taong-gulang at tatlong-taong-gulang.
Samantala, higit 10,000 na residente ng Pagalungan at Montawal ang lumikas na dahil sa pag-apaw ng mga ilog bunsod ng walang tigil na pag-ulan mula noong nakaraang linggo.
Inaalam pa rin ng mga awtoridad kung paano nalunod ang dalawang bata.
Nangyari ang insidente pagkatapos makapagligtas ang mga awtoridad ng isang nalulunod na bata. Ang bata na nakilalang si Annie ay tumatawid sa hanggang baywang na baha sa bayan ng Pagalungan.