Money Transfer sa Batangas nilooban

MANILA, Philippines – Nilooban ng isang armadong grupo ng mga kalalakihan ang sangay ng Western Union money transfer sa Batangas ngayong Lunes.

Nagpanggap umano bilang mga customer ang mga suspek kaya nakapasok sa establisyamento sa J.P. Laurel Street, Barangay Mataas na Lupa.

Pagpasok na pagpasok sa loob ng Western Union, agad dinisarmahan ng mga suspek ang sekyu na si Juny Verna.

Pagkatapos agawin ang baril ng sekyu, puwersahang pinabuksan ng mga armadong lalaki ang kaha de yero sa teller na si Kenneth Altamirano.

Agad tumakas ang mga suspek sakay ng isang itim na motorsiklo matapos kubrahin ang laman ng kaha de yero.

Kinuha din ng mga suspek ang clutch bag ni Altamirano na may lamang P1,200.