‘Na-ano Lang’

May policy ang isang private school na libre ang tuition fee kapag ang parehong magulang ng estudyante ay nagsisimba rin sa kanilang Christian church.

Sa araw ng enrollment ay nakapila ang isang nanay para sa kanyang dalawang anak. Nagtiyaga ang nanay na ipasok ang kanyang anak sa nasabing school dahil sa magandang turo at pagdidisiplina sa mga estudyante.

Nagtataka lang ang nanay kung bakit may kalakihan pa rin ang binabayaran niyang matrikula, samantalang tatlo silang mag-iina na nagsisimba sa church-school. Kinausap ng nanay ang principal ng eskuwelahan na nag-uusisa kung bakit mahal pa rin ang tuition fees ng kanyang mga anak.

Ang katuwiran ng lalaking principal ay dapat parehong magulang ang nagsisimba. Mahinahon na sinagot ng nanay ang principal na “bakit po nanay ako at the same time ay tatay din naman ako ng mga anak ko,” pangangatwiran ng single mother.

Natulala ang principal at nangakong bibigyan ng atensiyon ang reklamo ng single mother.  Hindi nga naman komo ‘na-ano lang’ ay hindi na magagawang itaguyod nang maayos at maganda ng single mother na tumatayo bilang nanay at tatay din ng kanyang mga anak.