Island of the Undead 130
PINAGTAWANAN lang ni Reyna Coreana ang balita ng kanyang sundalo. Na dumating na ang mga kalaban, ibig sabihin sina Miley, Lorenz at mga kasama.
“Hahaha! Halika nga dito, kawal kong magaling, lumapit ka …”
Lumapit naman ang kawal.
Binatukan agad ito ni Reyna Miley. “Um!”
“B-bakit po? Ibinalita ko lang naman po na dumating na ang mga kalaban, lumusob!”
“O, e, bakit parang takot na takot ka? Kailan pa ba tayo natatakot sa mga ‘yan? Mabuti nga at lumusob sila at nang mapadali ang pag-ubos natin sa mga istorbong ‘yan!”
Binalingan ni Reyna Miley si Haring Blizzard. “Mahal kong hari, ito na ang pagkakataon mo para matupad ang iyong tungkulin sa akin. Ang patayin si Miley at ialay mo sa akin ang kanyang ulo. Para maniwala akong nagawa mo nga ang iyong misyon.”
Hindi kaagad nakasagot si Blizzard.
Tumaas ang kilay pati boses ng reyna. “O, ano? Ayaw mo? Ginawa pa naman kitang hari para maging karapat-dapat sa pagka-reyna ko!”
“M-mahal kong reyna, huwag kang magagalit. Tutuparin ko ang aking tungkulin. Papatayin ko si Miley, pupugutan ng ulo at iaalay sa iyo ang maganda niyang ulo.”
Napangisi si Reyna Miley. “Mabuti. Kapag nagawa mo ‘yan, itong nag-iisang mukha ko na lang ang lagi mong makikita. Ipapagamit ko sa iyo ang napakatindi kong sandata, Haring Blizzard.”
“Kawal, kunin mo ang espada ng kamatayan!”
“O-Opo, mahal na reyna …”
Dala na ng kawal ang espada. Ito’y mahaba, malapad at nangingintab ang talim. Ang handle ay yari sa metal na bungo ang hugis.
Kinuha ni Reyna Miley ang espada at tila nasa isang seremonyang ibinigay kay Blizzard.
“Tanggapin mo, aking hari. At tandaan mo, ang unang iaaalay mo sa akin mula sa talim ng espada ng kamatayan ay si Miley. Lumakad ka na, sumama ka sa mga kawal na pupuksa sa mga ambisyosong taong akala ay matatalo nila tayo!”
Sa pangunguna nga ni Blizzard ay sinalubong nila ang grupo nina Miley at Lorenz.
May arrow na lumipad, mula kay Miley, tangay nito sa dulo ang dinikdik na mabangong halaman. Tumama ito sa kawal na katabi ni Blizzard. Nangisay ang kawal. - ITUTULOY
- Latest
