Magiging ‘forever’ ba kayo?

Paano mo nga ba masasabi na magtatagal ang inyong relasyon ng iyong partner sa kabila ng napakaraming indifferences o pagkakaiba ng inyong pag-uugali? Minsan kasi, ito ang nagiging dahilan ng paghihiwalay ng isang mag-asawa/mag-partner. Narito ang ilang palatandaan na magtatagal kayong magkasama hanggang sa inyong pagtanda:

Nagkukuwentuhan ng tsismis/nakatutuwang mga bagay – Minsan, masyadong nagiging pormal ang isang mag-asawa kapag sila ay may tampuhan, pero ang hindi alam ng marami, isang paraan para magbati sila ay ang pagbabato ng “joke” o birong salita sa kanilang partner. Mabuting panimula ng pagbubukas ng komunikasyon ay ang pagjo-joke, ito ay upang maalis ang anumang tensiyon sa pagitan ninyong dalawa. Kapag ganito ang inyong sistema, hindi malabong magtagal ang inyong pagsasama hanggang sa kayo ay tumanda, dahil kapwa alam ninyo kung paano pakakalmahin ang bagyo ng galit sa dibdib ng bawat isa. Mabuti rin sa pagsasama ang pagkukuwentuhan ng tsismis o nakakatawang mga bagay. Isa kasi ang ganitong uri ng kuwentuhan para ma-relax ang mga babae, kaya dapat naman na “sakyan” ito ng mga lalaki.

Hindi nagbibilangan ng trabaho – Dapat sa larong boxing lang mayroong score card at hindi sa loob ng bahay. Para sa mga babae, hindi dapat na binibilang ang ginagawang trabaho at sa mga lalaki naman, hindi rin dapat binibilang ang naibibigay na “rescue” para kay misis. Kung ang inyong pagsasama ay puno ng pag-aalaga at pag-aalala sa ikabubuti at ikare-relax ng bawat isa, tiyak na swak kayong magkakasama “forever”.