Nakabuntis ang bf

Dear Vanezza,

Limang taon na po kami ng bf ko. Balak na po sana naming magpakasal. Pero nitong nakaraang buwan ay nagtapat siya sa akin na nakabuntis daw s’ya. Syempre po nasaktan ako. Kaya lang sa halip na siya ang magpakumbaba, parang siya pa ang nagmamalaki. Mahal ba niya ako talaga? Kami kaya ang magkakatuluyan hanggang sa huli? Bigyan po ni’yo ako ng payo sa dapat kong gawin? Paano ko rin siya mapapahinto sa bisyo niyang pag-inom kasama ng mga barkada? - Eva

Dear Eva,

Dapat ka ng mag-isip tungkol sa magiging kinabukasan mo kung siya ang makakatuluyan mo. Ngayon pa lang ay lumalabas na ang tunay niyang kulay. Magsyota pa lang kayo ay nagawa ka na niyang kaliwain, paano pa kaya kung mag-asawa na kayo. Kausapin mo siya sa plano niya sa babaeng nabuntis niya. Kailangang malaman mo ito dahil posibleng magkaproblema kayo pagdating ng araw. Kung hindi man niya pakasalan yung babae, obligasyon pa rin niyang panagutan ang bata lalo na’t inamin niyang siya ang nakabuntis sa babae. Mahalagang pag-usapan ninyo ang mga bagay na ito bago n’yo planuhin ang pagpapakasal. Pag-isipan mo ring mabuti kung ang bf mo na ba ang lalaking karapat-dapat sa’yo at gusto mong makasama sa habambuhay. Gaya ng kasabihan ng matatanda, ang pag-aasawa ay hindi kaning isusubo na iluluwa kapag napaso.

Sumasaiyo,

Vanezza