Bakit kailangan mong magdasal? (1)

Napakaraming pamamaraan kung paano maaalis ang iyong stress. Nariyan ang pageehersisyo, pagda-diet, pagsa-shopping at kung anu-ano pa, para lang magkaroon ng maayos na kalusugan dahil nailalabas mo ang iyong stress sa katawan. Pero, kung ikaw ay isang madasaling tao at nanalangin araw-araw, pagkagising mo sa umaga, hindi nasasayang ang ginagawa mong ito dahil may benepisyo ang pagdarasal sa iyong pisikal at ispirituwal na katawan. Sa pag-aaral na isinagawa ni Lisa Miller, propesor at director ng Clinical Psychology at director din ng Spirituality Mind Body Institute  sa Teachers College, Columbia University, lumalabas na karamihan sa mga nagkakaroon ng depresyon ay may kaugnayan sa kanilang family history. Nang tingnan din ang MRI ng ilang pasyente nila, lumabas na ang mga taong regular na nagdarasal ay mayroong makapal na cortices kumpara sa mga taong hindi nagpapahalaga sa pananalangin. Kapag mayroong makapal na cortices, mas maliit ang tsansa nito na magkaroon ng depresyon kumpara sa mga may maninipis na cortices. Dahil dito, napatunayan na may benepisyo sa pisikal na katawan kung ikaw ay palaging nagdarasal. Narito pa ang ilang benepisyo na naidudulot ng panalangin:

Stress Free – Gaya ng unang nabanggit, nakakaalis ito ng stress dahil naiimpluwensiyahan ng pananalangin ang iyong isip, kaya naman nare-relax ito. Dahil dito, susunod na rin ma-relax ang iba pang bahagi ng iyong katawan, lalo na ang iyong puso.(Itutuloy)