Ang babaing kinakain ang lahat (62)

UBOS na ubos si Greg, kinain ni Tatiana ang lahat-lahat sa lalaking nadaig ng tukso.

Naglaho sa mundo si Greg nang walang anumang bakas; without a trace.

Nakikiramdam sa sarili si Tatiana. Siya ba raw ay nabusog?

“Bitin na bitin pa ako, gutom na gutom pa,” bulong niya sa sarili, nagpalinga-linga sa loob ng interrogation room.

Madilim doon, nakababa ang blinds. Tiniyak talaga ni Greg na walang makakakita sa kanilang kahalayan.

Napangiti si Tatiana, ngiting mapakla. “Sabagay, namatay naman sa sarap ang hinayupak. Kahihiyan siya ng pulisya”.

Binuksan niya ang ilaw, itinaas ang blinds. Nakita niya ang ilang tauhan ni Greg na malis-yoso ang ngiti.

Alam pala ng mga ito ang mahalay na bisyo ng pinuno.

BOG-BOG-BOGG.  Hinampas ni Tatiana ng kamay ang salaming nakaharang sa interrogation room.

 “Palabasin n’yo ako rito! Ngayundin!” sigaw ni Tatiana, bakas ang galit sa mukha. “Kundi’y magsisisi kayo!”

Napaigtad ang mga tauhan ni Greg, nagtataka. Paanong nangyaring narinig nila ang sigaw ng babae gayung sound-proof ang interrogation room?

 At bakit naman super-arogante ang babaing suspect? Magsisisi raw sila kapag hindi ito pinalabas agad?

Bahala ang Boss Greg nila dito,  sa loob-loob ng mga tauhan. Si Tatiana ay hindi nila pinansin.

Pero napansin nila na wala sa interrogation room si Greg. Nagtaka sila. Saan na napunta ang pinuno?

Napilitang pumasok ang dalawang tauhan para magsiyasat.

Iyon ang pagkakamali nila. Sabay silang sinunggaban ni Tatiana sa kamay, magkasunod na kinagat sa mukha. Kitsikk. (ITUTULOY)