Ginugulo ng ex-bf

Dear Vanezza,

Masaya po kami at nagmamahalan ng aking kinakasamang tibo. Hanggang sa guluhin kami ng aking dating bf sa pamamagitan ng mga text at tawag. Nagsimula ito nang malaman ng aking ex na may kinakasama na ako. Nagbanta pa siya na hindi kami titigilan hanggat hindi kami nagkakahiwalay ng aking kinakasama. Mayroon ng gf ang ex ko kaya hindi ko maintindihan kung bakit ginigulo pa niya ako. Nagiging dahilan na ng madalas na pagtatalo namin ng kinakasama ko ang panggugulo niya dahil nagseselos na siya. Natatakot tuloy ako na masira ang relasyon namin ng kinakasama ko. Ano ang pwede kong gawin? - Mona

Dear Mona,

Magpalit ka na ng sim card para tuluyan nang maputol ang ugnayan ninyo ng iyong dating nobyo. Kung manggugulo pa rin siya pwede mo siyang ireklamo sa pulis dahil sa kanyang mga pagbabanta. Sikapin mo ring ipaunawa sa kinakasama mo na walang sino man ang puwedeng sumira ng iyong pagsasama. Makikita naman niya na gumagawa ka ng paraan para iwasan ang ex mo. Iparamdam mo sa kanya na siya lang ang iyong mahal at ang tungkol sa inyo ng ex mo ay isa na lamang nakaraan na matagal mo ng kinalimutan.